සියල්ලෝම තද නින්දේ
රාත්‍රිය එළැඹුණා පමණි
නිහඬ නිසසල බව
බිදලන රැහැයි ගෙඹි
හඬ හැරුණු විට
ඉදහිට බුරන සුනඛ හඬ
රැයේ කාලකි ගෙවී ඇත්තේ
අමාවක දා එකලෙසට කළුවර
තරු හංගා වලාපිරි අහසේ
එළියක සලකුණු රහිතව
රැයටම ඇති කණාමැදිරි එළි
ඉතිරි හරියම කාන්සිය පමණි
එක දිගට එන රැහැයියන්ගේ
ගෝරනාඩු හඬ, උපදවා හිසේරුදා
රැයේ තනියට උන්වත් නොහිටින්න
ජීවයක් රහිතවම ගෙවෙනු ඇත
නිනව්වක් නම් නොමැති රැහැයි හඬ
කෙසේහෝ උන්ගෙන් පවතීවි
ගිම්හාන දහවලේ හැපී තෙරපී
දහඩියෙන් තෙත්වූ පෙගීගිය
ජීවිතය ගැටගසා ගැනුණු වස්
මරු හා සටන්වැද දවස අවසන
දවාළු ගතසිත නිවා සැනහිමුත්
රැය පුරා දුම්දමයි දහවලේ ගින්නෙන්
එක් පැයක් ගෙවීඇත
ඝණාදුරේ රාත්‍රියෙන්
වාරුවක් නොමැති මේ රැයේ
නින්ද ආ නොවීනම්
කරන්ට කිසිත් නොමැතිව
මුමුණමින් දොඩන්නට වේ!
No comments:
Post a Comment